Sonur eins af sex meintum fórnarlömbum Skúla Tómasar Gunnlaugssonar læknis svarar honum í stuttri en harðorðri færslu á Facebook.
Sjá einnig: Dr. Skúli segist hafður fyrir rangri sök – Sjúklingur hans missti part úr eyra
Beggi Dan, sonur Dönu Jóhannsdóttur sem lést í umsjón Skúla T. Gunnlaugssonar, þáverandi yfirlækni á Heilbrigðisstofnun Suðurlands, er allt annað en sáttur við færslu læknisins sem birtist í fjölmiðlum í gær, þar sem læknirinn segist hafður fyrir rangri sök. Þá segist læknirinn einnig í Facebook-færslunni að sérfræðingar hafi gefið þá útskýringu að allir sex sjúklingarnir hafi dáið af „náttúrulegum orsökum“. Þessu er Beggi ósammála.
„Ég er ekki sérfræðingur en ætli það sé ekki þannig að þeir sem eru settir á lífslokameðferð deyji af “náttúrlegum orsökum”? Ég varð vitni af því þegar móðir mín var aflífuð og ég get fullyrt það að hún dó ekki af náttúrlegum orsökum. Svo spyr maður sig, fyrst að þetta var náttúrulegt og voðalega fínt allt, af hverju sendir lögreglan málið áfram í ákæruferli í stað þess að fella málið einfaldlega niður? Þetta er ömurleg tilraun lífslokalæknisins Skúla Gunnlaugssonar til að hvítþvo hendur sínar af ótímabærum dauða sex sjúklinga sinna. Sex! Sannleikurinn mun koma í ljós!“
Sjá einnig: Beggi Dan: „Síðustu vikurnar í lífi móður minnar voru henni hreinasta kvalræði“