Bændurnir sem eiga ekki í nein hús að venda fóru ekki varhluta af bóndadeginum. Guðmundur Ingi Þóroddsson, formaður Afstöðu – félags fanga á Íslandi, greinir frá því á Facebook að þeir hafi fengið ýmislegt góðgæti og fatnað í kvöld.
Hann skrifar: „Hafdis Helga, Domino’s Pizza – Ísland, Ásmundur Atlason, Coca-Cola Europacific Partners á Íslandi, Polo Hafnarfjörður, Rafrettur.is og fleiri mættu með fullt af góðgæti og fatnað á gistiskýlin í tilefni bóndadagsins núna rétt fyrir kvöldmat. “Bændurnir” í skýlunum eru himinlifandi og skila mjög góðri kveðju og þakklæti sem þeir óskuðu eftir að við kæmum til skila.“
Guðmundur segir bændurna geta nartað í pizzu alla helgi, svo margar hafi þær verið. „Það kom ýmislegt fleira en er á myndinni en í hamagangnum gleymdist að taka myndir af því og pizzurnar eru þrefalt fleiri en eru á vagninum. Þannig að það verður nartað í pizzur um helgina. Takk allir sem einn.“