Björn Birgisson fagnar stuðningnum sem Sósíalistaflokkurinn er að fá, þrátt fyrir allt mótlætið sem hann segir flokkinn verða fyrir.
Samkvæmt nýrri skoðanakönnun Gallups er Samfylkingin með mest fylgi stjórnmálaflokka með 25,3 prósent fylgi. Minnsti flokkurinn er hins vegar Sósíalistaflokkur Íslands með 4,4 prósent fylgi. Einhverjir myndu hvá yfir svo lágri prósentu en ekki samfélagsrýnirinn Björn Birgisson. Björn er afar ánægður með fylgið og ástæðan er einföld. Segir hann í Facebook-færslu að flokkurinn hafi staðið í ströngu að undanförnu við „afhjúpanir á vondu fólki“. Fleira tiltekur hann en segir svo að lokum: „Geggjaður stuðningur! Ástþór hefði ekki slegið hendinni á móti svona tölu!“
Færsluna má lesa hér að neðan:
„Á maður að verða undrandi?
Á maður að verða dapur?
Á maður að verða sorgmæddur?
Á maður bara að hlæja sig máttlausan?
**********
Sósíalistaflokkur Íslands eyðir öllu sínu púðri í að standa með Eflingu hvað sem á dynur.
Virkilega drullar yfir allt sem snýr að Samtökum atvinnulífsins, Halldóri Benjamín og öllu hans hyski.
Vilhjálmur Birgisson og Starfsgreinasambandið fá ótaldar eiturpillur fyrir að hafa vogað sér að semja án Eflingar, sem vildi reyndar ekki vera með.
Ragnar Þór og aðrir VR-ingar, ásamt iðnaðarmönnum fá líka væna skammta af eitruðum skotum fyrir það eitt að voga sér að semja fyrir fólkið sitt.
Ríkissáttasemjari fær það heldur betur óþvegið líka, ríkisstjórnin, dómstólar og dómarar, kjararáð Samfylkingarinnar, Vinstri græn og eiginlega allir sem eru ekki í réttmerktum svörtum jökkum!
Mikil vinna, mikil átök og mikið gefið af sér!
Hver er svo uppskeran og stuðningurinn eftir allar þessar fórnir, alla þessa úthúðun og afhjúpanir á vondu fólki, illa þenkjandi fólki og svo allt þetta sálardrepandi puð, ásamt öllum fýluköstunum sem fylgja svona drullumalli?
Ástþór hefði ekki slegið hendinni á móti svona tölu!“
