Gústaf Níelsson – bróðir Brynjars – ritar nokkur orð um kjaradeilu Eflingar og SA, og virðist lítt hrifinn af Sólveigu Önnu Jónsdóttur verkalýðsleiðtoga og baráttukonu.
Svo mælir Gústaf:
„Sólveig Anna er verkalýðsforingi lýsingarorðanna og úreltrar verkalýðsbaráttu. Henni er í nöp við hið svokallaða auðvaldsþjóðfélag og hefur ekki í hyggju að semja um kaup og kjör; frekar að valda sem mestu tjóni.“
Honum þykja aðferðir og hugmyndafræði Sólveigar Önnu í kjaradeilunni vera lítt vænlegar til árangurs fyrir samfélagið allt hérna á klakanum:
„Það er í anda þeirrar hugmyndafræði sem hún starfar eftir, enda lítur hún svo á að félagsmenn hennar hafi þjóðfélagið í hendi sér. Henni greinilega yfirsést að nútíma þjóðfélag er samansett af mörgum tannhjólum og mörgum keðjum og sannleikurinn er sá að bresti eitt tannhjólið eða keðjan, bregst allt gangverkið.“
Lokaorðin:
„Allar stéttir hafa „þjóðfélagið í hendi sér“, ef því er að skipta. Legg ég til að stjórnvöldin grípi strax í taumana með lagasetningu og svo má fara í það verkefni að koma skikki á „leikskólann“. Verkbannshugmynd SA er vanhugsuð og mun valda gríðarlegu tjóni og æra óstöðugan.“