Leitin að Gunnari Svan Björgvinssyni var haldið áfram í morgun, samkvæmt tilkynningu sem var að berast frá lögreglunni á Eskifirði.
Í yfirlýsingunni segir að eftirgrennslan og leit hafi staðið yfir að Gunnari Svan Björgvinssyni frá því síðastliðinn sunnudag. Vísbendinga um ferðir Gunnars hafi í upphafi veirð leitað og markmiðið meðal annars að þrengja hugsanlegt leitarsvæði. Leitarsvæðið miðað við fyrirliggjandi niðurstöðu er Eskifjörður og nágrenni, að sögn lögreglu.
Þá segir í tilkynningunni að í morgun hafi farið fram leit með þyrlu Landhelgisgæslu. Leitað var í Reyðarfirði og Eskifirði. Að sögn lögreglu voru leitarskilyrði góð þó leit bæri ekki árangur.
Í niðurlagi tilkynningar lögreglunnar segir orðrétt:
„Á mánudag meðan enn voru óljósar upplýsingar um ferðir Gunnars voru fjörur Eskifjarðar gengnar og leitað í bænum. Áfram verður haldið á þeirri braut; fjörur leitaðar, hlíðar ofan Eskifjarðar gengnar og leit framkvæmd í bænum einnig. Íbúar eru því beðnir um að láta sér ekki bregða sjáist björgunarsveitarfólk nærri heimilum þeirra á morgun og um helgina. Biðlað er og til þeirra að skoða sitt nærumhverfi, einkum skúra, geymslur og önnur rými sem að öllu jöfnu eru mannlaus.“