Brynjar Níelsson fer mikinn í hlaðvarpsþættinum Ein pæling á Vísir.is sem er í umsjón Þórarins Hjartarsonar. Segir hann meðal annars að stéttarskipting sé ekki til á Íslandi.
Aðstoðamaður Dómsmálaráðherra, hinn umdeildi Brynjar Níelsson skóf ekki af því í nýju viðtali sem hann var í í hlaðvarpsþættingum Ein pæling. Á einum stað í viðtalinu er hann spurður út í Madame Butterly málið sem kom upp í íslensku Óperunni en Þórarinn spyr hann hvað honum finnist um það mál, þar sem Óperan var sökum um menningarnám. „Ég eiginlega skil ekki þessa vitleysu,“ svaraði Brynjar og brosti. Hann hélt áfram: „Leikrit er leikrit sko. Og þetta er sviðslist. Og þú ert að fara í hinu ýmsa heima. Þetta er ekki bara þinn heimur, í kringum þig. Við getum hugsað okkur japanskt leikhús sem taki einhverjar bókmenntir um landnema í Vestrinu. Og klæddu sig upp eins og þeir. Japanskt leikhús getur þá sett á sig kúrekahatt og setja það á svið, þó þeir séu japanskir leikararnir. Þetta er bara hluti af því. Þú ert að endurspegla eitthvað sem er ekki endilega þekkt í þínum menningarheimi.“
Brynjar sagði svo að það sé alltaf eitthvað stríð í gangi, sé horft til baka í sögunni. Það hafi til dæmis verið stéttastríð sem hafi svo horfið þegar að sósíalisminn hrundi. Þá hafi tekið við kynjastríð. „Og nú er þetta orðið í bland, barátta kynþátta. Af því að nú eru komnir svo margir kynþættir á hverjum stað, sérstaklega hér á Vesturlöndum. Þá er komið þetta kynþáttastríð. Það er eins og frelsið henti aldrei neinum. Það er alltaf einhver hópur móðgaður. Einhverjum misboðið. En ef þú vilt lifa í frjálsu samfélagi, þá þarftu bara að umbera það að það er eitthvað leikrit, sem getur verið um þinn kynþátt en hann er leikinn af einhverjum allt öðrum. Og það er auðvitað bara allt í lagi. Þetta er bara hluti af listinni, hluti af frelsi listamannsins. Það má gera hvað sem er. Við gerum grín að öldruðum. Við gerum grín að hvítum, miðaldra Sjálfstæðismönnum.“
Þegar Þórarinn spurði hann hvað honum finnist um þá skýringu sumra að til séu ákveðnir undirokaðir minnihlutahópar sem ættu að vera undanskildir „gríni og glensi“ svaraði Brynjar um hæl: „Þetta er alltaf sama gamla vinstrimennskan, það er undirokuð alþýðan, undirokaðu kynþáttu, undirokaðar konur, þetta snýst allt um þetta. Og ef þú ferð í þennan hóp, hverjir eru í þessu kynjastríði? Þetta eru bara gamlir sósíalistar eftir að þetta stéttastríð hvarf. Þeir eru meira að segja að reyna að rífa upp stéttastríðið aftur núna. Þú sérð eitthvað leikrit núna eftir Gunnar Helgason þar sem menn halda því fram að fátækir séu alltaf að verða fátækari og allt sé að verða verra. Þetta er allt einhver þvæla. Þetta er bara rangt!“ sagði Brynjar og segir að menn séu enn að reyna að halda því fram að munurinn á milli ríkra og fátækra sé að aukast á Íslandi. „Ef þú ferð til Tenerife og ert á hóteli. Þá er ég á hóteli með öryrkjanum, ég er á hótelinu með innflytjandanum, ég er á hótelinu með heildsalanum og ég er á hótelinu með stórkaupmanninum. Allir á sama hóteli sko.“ Bætti hann því við að það væri ekkert stéttastríð á Íslandi en „það eru nokkrir menn sem eiga verðmæt fyrirtæki en það er allt og sumt.“
Hér má sjá brot úr viðtalinu: