Ósáttur hælisleitandi hótaði að kveikja í sér við Útlendingastofnun – Lögreglan kölluð til

Betur fór en á horfðist er lögreglan var kölluð að húsnæði Útlendingastofnunnar á Dalvegi í Kópavogi í hádeginu, en þar var tilkynnt um mann sem hótaði að bera eld að sjálfum sér.

Samkvæmt tilkynningu frá lögreglunni var viðkomandi rólegur en hafði hellt yfir sig eldfimum vökva og hélt á kveikjara. Ástæðan fyrir hótun mannsins mun vera óánægja hans með afgreiðslu máls, en umsókn hans um alþjóðlega vernd er til meðferðar hjá yfirvöldum. Maðurinn var færður af staðnum og fékk viðeigandi aðstoð.

Lögreglan var með talsverðan viðbúnað vegna málsins og einnig var slökkvilið í viðbragðsstöðu. Tilkynningin um hótunina barst kl. 12.23 og var aðgerðum lokið fyrir klukkan eitt.