Vandi sjálfstæðisflokksins vegna yfirvofandi ráðherraskipta fer enn vaxandi. Við upphaf núverandi ríkisstjórnarsamstarfs var afráðið að Jón Gunnarsson dómsmálaráðherra myndi víkja og Guðrún Hafsteinsdóttir, fyrsti þingmaður Sunnlendinga, taka við embætti hans. Rætt var um um að skiptin yrðu i mars síðastliðnum en ekkert gerist.
Jón Gunnarsson hefur verið hinn versti vegna málsins og alls ekki sáttur með að víkja. Fullyrt er að hann hafi haft í hótunum um að segja af sér þingmennsku ef staðið verði við áformin. Þar með yrði lögmaðurinn Arnar Þór Jónsson alþingismaður flokksins. Arnar Þór hefur gjarnan uppi skoðanir sem núverandi forystu flokksins hugnast ekki. Innkoma Arnars Þórs vekur þeim því hroll. Ekki lagaðist ástandið í liðinni viku þegar varaþingmaðurinn krafðist þess að allir ráðamenn Sjálfstæðisflokksins segðu af sér fyrir að hafa sagt skilið við stefnu sína og hugsjónir með því að framselja sjálfstæði þjóðarinnar til Evrópusambandsisins með nýrri bókun við EES-samninginn. Þingmannsefnið vill að breytt verði um nafn á Sjálfstæðisflokknum og hann nefndur Flokkurinn. Bjarni Benediktsson formaður er augljóslega í pattstöðu og situr uppi með Jón á ráðherrastóli fremur en að hleypa minknum inn í hænsnabúið. Forvitnilegt verður að sjá hver niðurstaðan verður …