Páll Ásgeir Ásgeirsson leiðsögumaður skaut fast á jeppafólk á Facebook í dag.
Páll, sem er leiðsögumaður hjá Ferðafélagi Íslands finnst lítið til koma mótmæla jeppafólks við friðun Þjórsárdals en þau sendu inn umsögn sem sjá má á vef Umhverfisstofnunar. Þar er haldið fram að framsetning friðunartillögunnar sýni „andúð í garð þeirra sem stunda útivist á hálendinu með aðstoð vélknúinna tækja.“ Páll gerir stólpagrín að umsögninni og rífur hana í raun í sundur með háði.
Færslu Páls Ásgeirs má lesa hér:
„“Við mótmælum þessari framsetningu harðlega og teljum þetta afhjúpa andúð í garð þeirra sem stunda útivist á hálendinu með aðstoð vélknúinna tækja.“ Ég rakst á þetta á vef Umhverfisstofnunar í umsögn frá jeppamönnum sem eru andvígir friðun Þjórsárdals. Til þess að stunda útivist þarf að vera úti undir berum himni. Sá sem ferðast akandi-lokaður inni í bíl er ekki að stunda útivist-heldur er á ferðalagi. „Útivist með aðstoð vélknúinna tækja“ er óskiljanleg froða-eiginlega þversögn. Sá sem horfir á náttúruna gegnum bílrúðu í heitum blæstri frá miðstöðinni með þungarokk í eyrunum getur alveg eins verið heima í sófanum að horfa á gamla Stikluþætti í sjónvarpinu. Svo þegar hann fer út á svalir að reykja þá getur hann sagst vera „að stunda útivist.“