Vegfarendum brá í brún þegar þeir sáu mann liggja hreyfingarlausan á umferðareyju. Haft var samband við lögreglu sem hélt þegar af stað á vettvang. Laganna verðir gripu þó í tómt þegar þá bar að garði. Maðuirinn hafði þá risið upp og var farinn sína leið.
Lögregla fór víða um í nótt í leit að óskoðuðum bílum og öðrum á nagladekkjum. Númer voru klippt af fimm bifreiðum vegna vanrækslu. Þá eiga nokkrir einstaklingar yfir höfði sér háa sekt vegna aksturs bifreiða á negldum hjólbörðum. Tveimur ökumönnum var gert að hætta akstri eftir að áfengismælir sýndi að þeir væru yfir leyfilegum mörkum.
Börn voru staðin að verki við búðaþjófnað í austurborginni. Foreldrar voru kallaðir til og Barnavernd látin vita.
Bílþjófur lagði á flótta þegar lögregla reyndi að stöðva hann. Honum voru gefin merki um að stöðva aksturinn en lét ekki segjast. Upphófst stutt eftirför lögreglu sem stóð þar til ökumaður stöðvaði bifreiðina. Þjófurinn reyndist jafnframt vera án gildra ökuréttinda. Þá var hann ekki í með öryggisbelti við aksturinn.