- Auglýsing -
Björn Birgisson minnist hjónanna Þórólfs Friðgeirssonar og Kristínar Lilju Halldórsdóttur sem hann kynntist á Fáskrúðsfirði árið 1971 með fallegum orðum á Facebook. Þórólfur lést 2019 en Kristín Lilja þann 5. júní síðastliðinn.
Segir samfélagsrýnirinn frá Grindavík að hann og Ingibjörg kona hans hafi verið nokkuð smeyk við að flytja austur á Fáskrúðsfjörð árið 1971 enda aldrei komið á Austurlandið áður. Segir hann í minningarorðum sínum að þau Þórólfur og Kristín Lilja hafi „umvafið“ fjölskyldu hans „með hlýlegum móttökum“ og því hafi kvíðahnúturinn raknað fljótt.
Björn gaf Mannlífi góðfúslegt leyfi til að birta minningarorð hans.
„Kveðjuorð.
Það var nokkur skrekkur í okkur Ingibjörgu haustið 1971, því við höfðum tekið þá ákvörðun að halda austur á Fáskrúðsfjörð með eins árs dóttur okkar.
Þetta var eins og hver önnur óvissuferð.
Það eina sem lá fyrir var að ég hafði fyrir algjöra tilviljun verið ráðinn kennari þar eystra.
Höfðum aldrei komið austur fyrir Akureyri og þekktum ekki nokkurn mann á Fáskrúðsfirði.
Kvíðahnúturinn var fljótur að rakna og vék fyrir létti og vellíðunartilfinningu.
Það var tekið svo einstaklega hlýlega á móti okkur.
Þórólfur Friðgeirsson skólastjóri og hans kona, Kristín Lilja Halldórsdóttir, hreinlega umvöfðu okkur með hlýlegum móttökum, sem og dætur þeirra, Ágústa þá 13 ára og Elsa Björg þá 10 ára.
Það má segja að heimili þeirra hafi staðið okkur opið þau fjögur ár sem við dvöldum eystra.
**********
Þórólfur lést þann 22. febrúar 2019 á 85. aldursári og Kristín Lilja fór í sumarlandið þann 5. júni síðast liðinn á 90. aldursárinu og var jarðsungin í dag, 20 júní.
Mikið sómafólk og blessuð sé minning þeirra hjóna.
Við Ingibjörg áttum því láni að fagna að kynnast þessari sómafjölskyldu og þau kynni teljast tvímælalaust vera einstök gæfuspor á okkar lífsleið, gæfuspor sem við erum þakklát fyrir.“