Alexander Lukashenko, einræðisherra Belarús, sagði á blaðamannafundi í dag að Wagner-liðar muni ekki koma nálægt kjarnorkuvopnum Rússa sem geymd eru í landinu.
Fram kemur í frétt Meduza að Yevgeny Prigozhin, leiðtogi Wagner-málaliðahópsins, sem nú dvelur í Belarús og undirmenn hans komi ekki nálægt kjarnavopnum rússneska hersins sem geymd eru í landinu. Þetta sagði Alexander Lukashenko, forseti og einræðisherra landsins. Sagði hann að búið væri nú þegar að flytja „verulegan hluta“ kjarnorkuvopna til Belarús frá Rússlandi.
„Pólverjar og aðrir halda að Wanger muni gæta kjarnorkuvopnanna og svo framvegis. Wagner mun ekki gæta neinna kjarnorkuvopna,“ sagði Lukashenko. Bætti hann því við að „verulegur hluti kjarnorkuvopnanna hefur nú þegar verið fluttur til Belarús.“ Sagði hann að rússneskir sérfræðingar bæru ábyrgð á viðhaldi kjarnorkuvopnanna.