Hátt í 300 ungmenni komu saman í Guðmundarlundi í Vatnsendalandi í Kópavogi í nótt. Tilefni þótti til að kalla til lögreglu vegna hávaða. Þá kom á daginn, lögreglu til undrunar, að hópurinn í skóginum var að grilla sykurpúða og undir hljómaði tónlist. Ekki sást vín á nokkrum manni. Lögreglumenn töldu þó að einhverjir hefðu laumast inn í skóginn til að dreypa á áfengum veigum. Aðspurðir gestir töldu að þetta væri heldur „vandræðalegt partý“ eins og segir í dagbók lögreglunnar. Ekkert þurfti að aðhafast frekar í Guðmundarlundi og héldu verðir laganna á brott. Eftir sat ungt fólk að sleikja sykurpúða.
Guðmundarlundur er útivistarsvæði, öllum opið, sem Skógræktarfélag Kópavogs á og rekur. Í lundinum eru grill til leigu, leiksvæði, minigolfvöllur og frisbýgolfvöllur.
Annað og verra var að gerast í Kópavogi þar sem tilkynnt var um líkamsárás í Hamraborg. Málið er í rannsókn. Fórnarlambið var flutt á slysadeild til aðhlynningar en gerendur flúðu af vettvangi.
Aðeins einn gisti fangageyslu lögreglunnar í nótt. Er það til dæmis um friðsama nótt. Talsvert var þó um ölvun og hávaða framan af nóttu. Í miðbænum voru menn á ferli með piparúða og væntanlega að ógna vegfarendum. Lögreglan gómaði mennina og færði á lögreglustöð. Pipardólgarnir fengu tiltal en var síðan sleppt út í nóttina.
Ástsjúkur ökumaður var staðinn að því reyna að tæla konur upp í bifreið sína. Athæfi hans tilkynnt til lögreglu. Óljóst um lyktir þess máls.