Lögregla var kölluð til í gærkvöldi til þess að vísa tveimur mönnum út úr bílageymslu en höfðu þeir komið sér þar fyrir í óþökk eiganda. Skömmu síðar hringdi starfsmaður verslunar á lögreglu og tilkynnti um þjófnað úr verslun. Lögregla fór á vettvang og afgreiddi málið á staðnum. Brotist var inn á leikskóla en engar frekari upplýsingar voru um málið í dagbók lögreglu.
Þá rannsakar lögregla líkamsárás sem átti sér stað í gærkvöldi. Líklegt þykir að maður hafi verið sleginn með verkfæri en óljóst er enn hvort viðkomandi hafi slasast alvarlega. Lögregla sinnti einnig reglubundnu umferðareftirliti og stöðvaði einn ökumann sem var án ökuréttinda. Annar ökumaður var stöðvaður vegna gruns um akstur undir áhifum vímuefna. Að sögn lögreglu var nóttin heldur róleg og enginn gisti í fangageymslu.