Starfsfólk hótels í hverfi 103 hafði samband við lögreglu í gærkvöldi vegna manns sem var með ógnandi tilburði í garð gesta og starfsfólks. Þegar lögregla mætti á vettvang fór maðurinn ekki að fyrirmælum lögreglu og var hann að lokum handtekinn og vistaður í fangaklefa. Stuttu síðar barst lögreglu tilkynning um aðila sem var til vandræða á veitingastað í hverfi 105. Maðurinn var grunaður um þjófnað og hafði hann einnig ógnað starfsfólki. Þegar hann fór ekki eftir fyrirmælum lögreglu var hann handtekinn og vistaður í fangaklefa.
Það varð uppi fótur og fit í Kópavogi í gær þegar kona ákvað að slá aðra í höfuðuð með glasi en atvikið átti sér stað á bar. Þegar lögregla mætti á svæðið neitaði konan að segja til nafns og var hún því handtekin. Þá bárust lögregu nokkrar hávaðakvartanir og sinnti lögregla einnig reglubundnu umferðareftirliti. Kemur fram í dagbóok lögreglu að margar beiðnir hafi borist lögreglu í gærkvöldi vegna aðila í annarlegu ástandi víðsvegar um borgina. Ofurölvaðir aðilar lágu á jörðinni í miðbænum sem lögregla aðstoðaði.