Garðyrkja er blómleg atvinnugrein og hefur á að skipa metnaðarfullu fagfólki sem vinnur ötullega að því að framleiða matvæli með ýmsum aðferðum, gróður sem hentar innanhúss sem utan, afskorin blóm sem gleðja við öll tækifæri, sem ræktar skóg og sinnir honum frá gróðursetningu til grisjunar og mótar og fegrar okkar nánasta umhverfi með gróðri og grjóti/hellum svo sómi er að. Grunnur að góðri fagþekkingu er að sjálfsögðu menntun og þjálfun í viðkomandi störfum. Garðyrkjunám Landbúnaðarháskóla Íslands (LbhÍ) fer fram við Garðyrkjudeild skólans á Reykjum í Ölfusi, rétt ofan við Hveragerði.
Starfsemi Landbúnaðarháskóla Íslands (LbhÍ) snertir öll 17 sjálfbærnimarkmið Sameinuðu þjóðanna, að engu undanskyldu. Stefna skólans til framtíðar speglar þau og stefnu ríkisstjórnarinnar um sjálfbæra þróun, loftslagsmarkmið, ósnortin víðerni og verndun náttúru og lífs. Skólinn mun á næstu árum leggja höfuðáherslu á að efla rannsóknir og alþjóðastarf og samþætta rannsóknir, nýsköpun og kennslu og þannig þjóna því hlutverki að skapa og miðla þekkingu á sviði sjálfbærrar nýtingar auðlinda, umhverfis, skipulags og matvælaframleiðslu á norðurslóðum.
Starfsmenntanám
Í starfsmenntanámi Landbúnaðarháskóla Íslands er hægt að sérhæfa sig á ýmsum sviðum landbúnaðar og skiptast brautir í; ylrækt, lífræna ræktun matjurta, garð- og skógarplöntuframleiðslu, búfræði, blómaskreytingar, skrúðgarðyrkju og skóg- og náttúrubraut. Starfsmenntanám á garðyrkjubrautum er sérhæft tveggja ára bók- og verklegt nám ásamt 60 vikna verknámssamningi undir handleiðslu garðyrkjufræðings eða -meistara. Umsóknarfrestur er til 15. júní 2020 fyrir haustönn 2020, en tekið er inn á garðyrkjubrautir annað hvert ár. Sótt er um á www.lbhi.is.
Grunn- og framhaldsnám
Í BS-námi er áhersla lögð á sveigjanleika þar sem nemandinn hefur tækifæri til að laga námið að aðstæðum og áhugasviðum sínum ásamt því að öðlast breiðan bakgrunn fyrir margvísleg störf eða frekari menntun. Boðið er upp á nám á BS-stigi í búvísindum, hestafræði, landslagsarkitektúr og í náttúru- og umhverfisfræði. Einstaklingsmiðað rannsóknarnám til meistara- og doktorsprófs í búvísindum og ýmsum greinum náttúru- og umhverfisvísinda er einnig í boði við skólann. Meistaranámsbraut í skipulagsfræði er kennd á starfsstöð skólans á Keldnaholti í Reykjavík og einnig er boðið upp á PhD-nám í skipulagsfræði. Nýjasta meistaranámsbrautin við skólann er alþjóðleg braut sem býður hágæða rannsóknatengt framhaldsnám á fræðasviði umhverfisfræða ásamt hagnýtri reynslu á Grænlandi, Íslandi og annars staðar á Norðurlöndum. Brautin kallast umhverfisbreytingar á norðurslóðum (e. Environmental Changes at Higher Latitudes) og hefst á haustönn 2020. Umsóknarfrestur í grunnnám er til 15. júní og í framhaldsnám til 20. maí. Sótt er um, eins og áður sagði, á www.lbhi.is.
