- Auglýsing -
„Seljandi er ekki að flýta sér að tæma, þrífa og skila af sér eigninni, eins og tíðkast í fasteignaviðskiptum. Er bara alveg sama um minn rekstur og hugsar bara um rassgatið á sjálfum sér. Þvílíkur rasshaus,“ segir Fiskikóngurinn Kristján Berg sem keypti húsnæði af Fjallajeppum hf. gegn háu verði. Þegar hann tók við eigninni kom á daginn að allt var í drasli innandyra og utan. Fiskikóngurinn er ekki aðeins í rusli heldur ævareiður og lætur jeppakarlana fá það óþvegið. Hann kvartaði við Fasteignamarkaðinn sem annaðist söluna en uppskar ónot.
„Stúlkan þar rífur bara kjaft og beitir sér ekki neitt í þessu máli,“ skrifar Kristján Berg.
Hann veltir upp þeirri spurningu hvort ekki megi fjarlægja draslið á kostnað seljendanna en sér ekki ljósið.
„Tillitsleysi, sjálfselska, frekja og yfirgangur. Fólki finnst ekkert mál að svíkja gerða fasteigna samninga og fasteignasalinn yppir bara öxlum“.
Fiskikóngurinn mun eyða Verslunarmannahelginni í það að taka til eftir jeppakarlana sem hafa að sögn fengið greitt fyrir húsnæðið en skila því af sér í megnasta ólestri.