Skógræktarfélag Reykjavíkur vill engar skyndilausnir í þyrluflugsmálinu.
Skógræktarfélag Reykjavíkur segir að verði þyrluflug flutt upp á Hólmsheiði muni það ekki leysa neinn vanda og sé aðeins skyndilausn en eins og hefur verið fjallað um undanfarna daga hafa íbúar höfuðborgarsvæðisins orðið varir við meiri þyrluumferð en áður hefur þekkst. Margt fólk hefur kvartað undan hávaða í þyrlunum. Helsta ástæða þess er útsýnisþyrluflug til að skoða eldgosið á Reykjanesi. Þá hefur verið lagt til að færa þyrluflugið upp á Hólmsheiði.
„Tíðar þyrluferðir frá Hólmsheiði myndu valda verulegu ónæði fyrir íbúa á austursvæðum borgarinnar og gesti nærliggjandi útivistarsvæða. Friðlandið í Heiðmörk, útivistarsvæðin við Rauðavatn og allt um kring, njóta sívaxandi vinsælda. Gróður á svæðunum er í mikilli framför, þökk sé óeigingjörnu starfi fyrri kynslóða sem ræktuðu upp illa farið land, gagngert til þess að fólk geti þar notið friðs og endurnærst í náttúrunni. Gróðursældin, náttúran og skjólið eru ómetanleg fyrir bæði andlega og líkamlega heilsu borgarbúa.
Viðvarandi hávaðamengun vegna þyrluflugs myndi spilla verulega ánægjunni af því að heimsækja þessar útivistarperlur og njóta náttúrunnar. Þá er hætt við að það ógni því mikla og fjölbreytta fuglalífi sem er í Heiðmörk.
Skógræktarfélag Reykjavíkur skorar á borgaryfirvöld að ráðast ekki í skyndilausnir þar sem miklum umhverfisverðmætum er fórnað án nokkurs sýnilegs ávinnings,“ segir í tilkynningu félagsins.