Lögreglan á höfuðborgarsvæðinu hefur haft í nægu að snúast í dag samkvæmt dagbók hennar en alls dvelja sex manns í fangaklefum lögreglunnar þegar þetta er ritað. Mikið hefur verið af aðstoðarbeiðnum út um allt höfuðborgarsvæðið og hefur lögreglan þurft að aðstoða fólk í annarlegu ástandi. Einnig hafa komið upp nokkuð af umferðarmálum.
Tilkynning barst lögreglu vegna íbúa í fjölbýlishúsi í annarlegu ástandi í sameign en aðilinn var til vandræða. Íbúinn lofaði að vera til friðs eftir samtal við lögreglu en nokkru seinna barst lögreglu aftur símtal en þá hafði sami aðilinn reynt að brjótast inn hjá nágranna sínum. Var hann handtekinn og vistaður í fangaklefa vegna málsins.
Fjórir aðilar voru handteknir og vistaðir vegna þjófnaðarmáls en málið er í rannsókn.
Lögreglan var tvisvar sinnum kölluð á slysadeildina í Fossvogi en í fyrra skiptið var aðili handtekinn fyrir utan deildina en hann hafði ógnað starfsfólki þar með skærum og var í afar slæmu ástandi vegna neyslu. Hann handtekinn og vistaður í fangaklefa.
Í seinna útkallinu óskaði slysadeildin eftir skjótri aðstoð þar sem sjúklingur gekk berserksgang. Eftir að lögreglan mætti á vettvang róaðist ástandið fljótt.