Fyrrum ráðherrann Ögmundur Jónsson er ósáttur með sölu á íslensku vatnsfyrirtæki.
Fyrir nokkrum dögum var fyrirtækið Icelandic Water Holdings selt í hendur erlendra fjárfesta og telja margir að það sé verið að selja íslenskar auðlindir til erlendra aðila. Ögmundur Jónsson, fyrrverandi ráðherra, hefur áhyggjur af þessari þróun.
„Ég hræðist svolítið stjórnvöld, bæði sveitarstjórnir og Alþingi, sem eru að verða ónæm fyrir þjóðinni. Þjóðin nefnilega vill halda eignarhaldi á auðlindum sínum og þar með vatninu,“ sagði Ögmundur í viðtali í Bítinu.
„Við erum komin ákaflega langt frá því sem áður var þegar málið snérist um að bóndinn hefði aðgang að vatni fyrir heimili sitt og búfénað. Við erum komin inn í þann heim þar sem vatn er nýtt í stórum stíl, er auðlind, auðsuppspretta sem stórfyrirtæki ráðast í. Þetta er allt annar heimur en var.“
„Að sjálfsögðu vil ég atvinnusköpun en ekki í anda Chiquita banana í Mið-Ameríku, ekki að láta auðlindirnar, hráefnin okkar frá okkur, eignarhaldið til útlanda. Þetta er að gerast rosalega hratt,“ sagði Ögmundur um málið og vill við hugsum lengra fram í tímann þegar svona ákvarðanir eru teknar því auðlindirnar séu alls ekki ótæmandi.