Furðuleg uppákoma varð í miðborginni í nótt þegar maður með ryksugu í eftirdragi var á ferð. Ekki liggur fyrir hver tilgangurinn með ferðalaginu var. Maðurinn fleygði ryksugunni frá sér og lagði á flótta þegar hann varð þess var að honum var veitt eftirtekt. Málið telst vera óupplýst. Á svipuðum slóðum brustu tveir menn í slagsmál.
Nokkuð var um innbrot og gripdeildir í nótt.
Ökumaður sem lenti í umferðaróhappi reyndist vera undir áhrifum vímuefna og því til viðbótar réttindalaus. Í Breiðholti var lögreglan kölluð út vegna þess að æstur maður olli truflunum.
Slökkvilið var kallað út vegna sinubruna í Hafnarfirði. Greiðlega gekk að slökkva. Óljóst er með upptök eldsins. Á sömu slóðum varð umferðarslys.
Lögreglu barst tilkynning um líkamsárás og rán í Kópavogi.
Á svæði Grafarvogslögreglu bar það helst til tíðinda að hávaði hélt vöku fyrir fólki. Andvaka fólkið kallaði til lögreglu. Þá voru krakkar að príla á húsþaki og stofna sér þannig í hættu. Þau létu af athæfi sínu áður en kom til afskipta lögreglunnar.