Goðsagnakenndi apinn Bóbó snýr aftur til Hveragerðis um helgina.
Um helgina verður bæjarhátíðin Blómstrandi dagar haldin í Hveragerði. Af því tilefni mun hinn goðsagnakenndi api, Bóbó mæta á svæðið og halda til í Blómaborg um helgina. Sunnlenska segir frá stórfréttinni.
Fjölmargir muna eftir Bóbó úr Eden í gamla daga en um helgina mun hann skemmta gestum og gangandi í Blómaborg fyrir nokkrar krónur sem allar renna til Einstakra barna. Áslaug Hanna og Jónas Sig, sem eru glænýjir eigendur Blómaborgar, verða með opið alla helgina en þar verður listasýning og margt fleira. Já og svo auðvitað Bóbó.
Þá kemur fram í frétt Sunnlenska.is að ekki sé nóg með það að Bóbó snúi aftur heim þessa helgi, heldur er búið að setja upp tívólí í bænum. Er þar um að ræða ferðatívólíið Taylor´s Tivoli.