Ráðist var á Erlu og Andreu í Höfðaborg í Suður-Afríku
Ráðist var á íslenskar stelpur í fyrradag í Höfðaborg í Suður-Afríku. Var maðurinn vopnaður skotvopni og steini og barði hann aðra þeirra.
„Hann náði að berja mig alveg frekar illa í kringum augun,“ sagði Erla Egilsdóttir í samtali við mbl.is en með henni í för var Andrea Heimisdóttir. Náði glæpamaðurinn bakpoka Andreu og hafði hann með sér á brott. Eftir að hafa náð að flýja manninn komust þær á sjúkrahús.
„Það voru allir mjög hjálplegir og það var kona sem gaf okkur gos og súkkulaði þegar hún skutlaði okkur heim af sjúkrahúsinu,“ sögðu vinkonurnar um málið en þær ætla að halda ferðinni áfram þrátt fyrir þessa uppákomu.
„Þetta var alveg mikið sjokk en við ætlum ekki að láta þetta stoppa okkur,“ sögðu þær tvær að lokum.