Gengi Samfylkingarinnar í skoðanakönnunum er ævintýralegt eftir að Kristrún Frostadóttir tók við stjórnartaumunum. Sjálfstæðisflokkurinn, sem hefur verið stærstur flokka, er nú í þeirri sneypuför að innan við 20 prósent kjósenda segjast vilja kjósa hann. Hinir stjórnarflokkarnir eru í miklum vanda og glíma við fylgishrun á meðan Samfylking Kristrúnar mælist með allt að þriðjungsfylgi.
Fullyrt er að Kristrún og Jóhann Páll Jóhannsson, alþingismaður og nánasti bandamaður hennar, leiti logandi ljósi að sterkum kandídötum til að stilla upp á lista með sér. Reiknað er með að af þingliðinu komi Logi Einarsson, fyrrverandi formaður, til með að vera í forystusæti en aðrir þingmenn muni hverfa á braut eða hafna neðar á listum. Þá er talið víst að Guðmundur Árni Stefánsson, varaformaður flokksins, muni leiða í Kraganum og ýta Þórunni Sveinbjarnardóttur út, gangi plön eftir .
Fullyrt er að á meðal helstu ráðgjafa Kristrúnar séu þeir Ólafur Ragnar Grímsson, fyrrverandi forseti Íslands, og Össur Skarphéðinsson, fyrrverandi formaður Samfylkingar, sem á sínum tíma halaði inn 32 prósent fylgi fyrir flokkinn. Báðir eru þeir einhverjir mestu refir íslenskrar stjórnmálssögu. Það eru spennandi kosningar í vændum …