Sjálfstæðismenn virðast varla styðja ráðherra eigin ríkisstjórnar.
Umdeilt bann Svandísar Svavarsdóttur, matvælaráðherra, á hvölum gæti orðið ríkisstjórninni að falli ef marka má ummæli Vilhjálms Árnasonar á RÚV í morgun. Þar gefur þingmaður og ritari Sjálfstæðisflokksins í skyn að Svandís verði ekki varin vantrauststillögu komist Umboðsmaður Alþingis að þeirri niðurstöðu að hún hafi brotið lög með banninu. En stuðningur Sjálfstæðismanna við Svandísi virðist velta á hvort að hún framlengi tímabundna hvalveiðibannið eða ekki
„Það er ekki ólíklegt að stjórnarandstaðan myndi leggja fram vantraust í slíkum aðstæðum,“ sagði Vilhjálmur ef Umboðsmaður Alþingis kemst að þeirri niðurstöðu að hún hafi brotið lög.
„Við höfum lýst því yfir að svona ákvörðun sé ekki til þess að skapa traust þannig að það þyrfti að taka á því þegar þar að kæmi. Það þyrfti að sjá forsendur slíkrar vantraustsyfirlýsingar.“
„Já já,“ sagði Vilhjálmur þegar hann var spurður hvort að næsta ákvörðun Svandísar muni hafa áhrif á hvort flokkurinn styðji vantraust. „Þegar svona ákvarðanir eru teknar þá er heildarmyndin skoðuð. Við þurfum að taka afstöðu út frá þeirri stöðu sem verður uppi þá.“
Erfitt er að túlka þetta á annan máta en dulbúna hótun.
Ekki náðist í Svandís Svavarsdóttur við vinnslu fréttarinnar.