Brynjar Níelsson hjólar í Heimildina og Íslandsdeild Transparency International í nýrri færslu á Facebook.
Segja má að Brynjar Níelsson, fyrrum aðstoðarmaður dómsmálaráðherra, hafi sett boxhanskana upp er hann skrifaði nýjustu Facebook-færslu sína. Lítið ber á hæðninni sem hann er þekktur fyrir í textanum þó það glitti í hana á nokkrum stöðum.
„Hlutlaus, frjáls og óháð félög eru í sérstöku uppáhaldi hjá mér um þessar mundir. Tvö þeirra skera sig úr, annars vegar Heimildin, sem segist vera fjölmiðill en þekkir ekki muninn á lygi og missögn og hins vegar Íslandsdeild Transparency International sem einhvern tíma gekk undir nafninu Gagnsæi, og ku berjast gegn spillingu án þess að skilja hugtakið. Framkvæmdastjórinn í því félagi er mér sérstaklega hugleikinn og er sú ást nánast orðin að þráhyggju.“
Segir hann bæði Heimildina og Atla Þór Fanndal, framkvæmdarstjóra ÍTI, mjög upptekna af mannréttinum að að þeir viti „hins vegar ekki að eignarrétturinn og atvinnufrelsi er sérstaklega mikilvægur hluti mannréttinda, en er ekki kúgun og ofbeldi auðvaldsins gegn sárþjáðri alþýðunni eða aðför að tilfinningalífi viðkvæmra sála úr lista- og menningarelítunni.“
Þá segir Brynjar að skilningur þeirar á tjáningafrelsinu sé „einnig mjög sérstakur.“ „Tjáningarfrelsið er nefnilega fyrir alla en ekki bara þá og skoðanabræður þeirra. Lygi, og missagnir ef því er að skipta, er hins vegar ekki hluti af tjáningarfrelsinu.“
Ennfremur sakar Brynjar þessa aðila um ofbeldi. „Svo má benda þeim á að skipulögð aðför gagnvart mönnum með „rangar“ eða „vondar“ skoðanir í þeim tilgangi að útiloka þá og svipta lífsviðurværi er ekki hluti af tjáningarfrelsinu, eins og má halda af skrifum framkvæmdastjóra Gagnsæis og ritstjóra Heimildarinnar. Það er ekkert skárra en þegar ríkisvald beitir þvingunarúrræðum gagnvart „óæskilegum“ skoðunum, eins og þekkt er í mörgum ríkjum. Ofbeldi af þessu tagi beitir aðeins ofstækisfólk, sem heldur að það sé að berjast fyrir góðum málstað, sem oftar en ekki reynist ekki svo góður þegar betur er að gáð.“