Brynjar Níelsson segir það mjög íþyngjandi fyrir skattgreiðendur ef hann færi á vog í hvert skipti sem hann gerði mistök.
Sigmar Guðmundsson þingmaður skrifaði pistil um SÁÁ á Vísi í morgun en þar upplýsir hann lesendur að hann hafi sótt sér hjálp inni á Vogi í sumar. Brynjar Níelsson skrifaði svo færslu á Facebook rétt fyrir hádegi en þar talar hann um Vog. Ekki minnist hann einu orði á Sigmar í færslunni en tímasetningin er grunsamleg.
Í færslunni viðurkennir Brynjar að hann sé ekki fullkominn og að hann eigi til að „gera upp á bak.“ Segir hann eiginkonu sína þó ekki láta hann komast upp með það að bera fyrir sig veikinda og „hlaupa upp á Vog í hvert sinn“ og bætir því við að slíkt væri „mjög íþyngjandi fyrir skattgreiðendur.“
Færsluna má lesa hér fyrir neðan.
„Ég er ekki fullkominn frekar en aðrir menn. Á það til að gera mistök og jafnvel upp á bak, eins og krakkarnir segja. Soffía lætur mig miskunnarlaust taka ábyrgð á öllum mistökum. Þýðir ekkert að bera fyrir mig veikindi og hlaupa upp á Vog í hvert sinn. Það væri mjög íþyngjandi fyrir skattgreiðendur. Soffía er mjög á móti því að ég taki pláss frá fólki sem raunveruleg þarf á því að halda. Segir að ég geti bara farið á námskeið í hegðun, atferli og framkomu og greitt fyrir það sjálfur. Nóg er af slíkum námskeiðum í boði.“