Ragnar Þór Ingólfsson, formaður VR, hefur hvatt fólk til að sýna afgreiðslufólki í verslunum kurteisi. Ragnar greindi frá því fyrir skemmstu að stéttarfélaginu VR hafi borist töluvert af kvörtunum þess efnis að viðskiptavinir sýni afgreiðslufólki verslana dónaskap á tímum COVID-19.
„Við erum að sjálfsögðu áhyggjufull yfir ástandinu og óvissunni. Það skilar sér í þreytu og streitu og sjálfsagt getur verið stutt í pirring. En við megum ekki undir nokkrum kringumstæðum láta það bitna á framlínufólki í verslunum sem leggur heilsu sína undir í að sjá okkur fyrir nauðsynjavörum og annarri þjónustu sem við teljum sjálfsagða á tímum sem þessum,“ skrifaði Ragnar meðal annars.
Guðmundur Marteinsson, framkvæmdastjóri Bónus, segir langflesta sýna starfsfólki Bónus kurteisi. Hann segir að miðað við þann fjölda viðskiptavina sem fari í gegnum verslanir Bónus þá sé hlutfall þeirra sem sýna afgreiðslufólki dónaskap lágt. Hann segir að vissulega séu einstaka undantekningar.
Hann segir starfsfólk verslana eiga hrós skilið. „Starfsfólkið okkar í búðunum eru hetjur,“ segir Guðmundur í skriflegu svari við fyrirspurn Mannlífs.