Nýjasti gestur Mannlífsins er maður sem gengið hefur í gegnum mikinn ólgusjó en það er skipstjórinn Páll Steingrímsson.
Páll hefur verið mikið í fjölmiðlum síðustu árin en hann er skipstjóri hjá Samherja og komst í fréttirnar þegar hann var sakaður um að vera „skæruliði“ Samherja. Þá steig hann fram og sagði frá eiturbyrlun sem hann varð fyrir en í kjölfarið var síma hans stolið og komið í hendur fjölmiðla, að sögn Páls.
Páll furðar sig á þögn stærstu fjölmiðla landsins varðandi eitrunarmálið og þjófnaðinn úr símanum hans og það hversu lítið pláss hans hlið á málinu hefur birst á ljósvakamiðlunum. Skipstjórinn segir ansi marga hafi haft harmi að hefna gegn honum vegna skrifa hans vegna málefna Samherja.
„Grímur Atlason formaður [framkvæmdarstjóri – innskot blaðamanns] Geðhjálpar sendi mér email og pantar fyrir mig tíma hjá geðlækni.“
Reynir Traustason spurði Pál af hverju Grímur hafi pantað fyrir hann tíma hjá geðlækni.
Páll svaraði: „Það er það sem ég spyr mig að en þarna eru liðnir þrír dagar síðan ég skrifaði grein um Helga Seljan. Og þá fær ég bara þetta, akkurat á þessum tímapunkti Reynir. Og mér fannst þetta mjög ósmekklegt hjá honum, að gera þetta.“
Reynir: „Bíddu, hann er framkvæmdarstjóri Geðhjálpar, hann sendir þér, sem slíkur væntanlega?“
Páll: „Já.“
Reynir: „Bréf um það að hann hefði pantað fyrir þig tíma hjá geðlækni. Hvaða endemis rugl er það?“
Páll: „Já, bíddu svo aðeins. Á þessum tímapunkti er ég að jarða föður minn og fannst þetta bara mjög ósmekklegt email. Fólk í kringum mig vildi að ég blastaði þessu þú veist, setti þetta á fésbók en ég ákvað að hafa samband við Kristján Þór. Hann er fyrrverandi heilbrigðisráðherra og vinur minn. Og Kristján segir bara við mig „Palli, hafðu bara samband við stjórn Geðhjálpar“. Og ég fæ bara afsökunarbeiðni og við áttum í samskiptum ég og Grímur og þetta var bara mál sem var sjattlað því mér fannst ekki vera ástæða til að henda þessu fram fyrir almenning, konan hans er formaður heilbrigðisnefndar alþingis, Helga Vala Helgadóttir. Ég ætlaði bara að reyna að halda þessu í láginni og reyna að sjattla þetta. En svo skrifar Aðalsteinn [Kjartansson – innsk. blaðamanns.] blaðagrein um að ég hafi ætlað að koma höggi á Helgu Völu með því að spyrja Kristján Þór en nei, það stóð aldrei til, þá hefði ég bara blastað þessu. Mér fannst þetta bara taktlaust, ósmekklegt!“
Aðspurður sagði Páll að Grímur hefði beðist afsökunar á tölvupóstinum. „Hann baðst afsökunar, hann hefði ætlar að senda þetta á nafna minn sem ég held að búi á Siglufirði og ég bara keypti þessa afsökun og var ekki að gera meira úr þessu. En svo fær maður einhverja blaðagrein um að maður hafi ætlað að koma höggi á Helgu Völu! Hvernig tekst blaðamönnum svona…“
Reynir bendir þarna á að blaðamenn séu oft að leita að ákveðnum vinklum í málum en Páll svarar því: „Já en þessi var bara alveg út úr kú, þú þarft nú bara að hafa verið á sveppatrippi til að komast að þessari niðurstöðu!“
Hægt er að sjá allt viðtalið hér.