Stjórnendur Ríkissjónvarpsins hafa augljóslega lítinn áhuga á því að gera Silfri Egils Helgasonar hátt undir höfði. Sú aðgerð að láta Egil fara og færa þáttinn af sunnudögum og yfir á síðkvöld mánudags sýnir að þátturinn er orðinn hornreka í veldi Stefáns Eirikssonar útvarpsstjóra.
Þátturinn er að formi til eins að því undanskildu að sá þaulreyndi Bergsteinn Sigurðsson var við stjórnvölinn í fyrsta þættinum og fórst það vel úr hendi. Aðrir nýjir stjórnendur voru ekki sýnilegir. Bergsteinn er kynslóðinni yngri en Egill og býr yfir meiri snerpu, hlutleysi og yfirvegun. Þá er ekki að sjá að hann sé hallur undir annaðhvort hægrið eða vinstrið. Eina áþreifanlega breytingin er sú að einkennisstefi þáttarins hefur verið breytt lítillega. Annars allt eins og áður var nema að áhorfendurnir eru sofnaðir og Egill horfinn.
Vandinn með nýjan útsendingartíma þáttarins er sá að stór hluti þeirra sem horfa gjarnan á Silfrið eru farnir að sofa á útsendingartíma hans og þátturinn missir marks fyrir vikið. Líklegt verður að teljast að Silfrið sé nú að hefja lokadans sinn eða verði fært aftur yfir á sunnudaga …