Titringur er að tjaldabaki í Sjálfstæðisflokksins vegna yfirvofandi ráðherraskipta. Brotthvarf Bjarna Benediktssonar af stóli fjármálaráðherra þýðir að einhver flokksmanna mun taka stökk upp á við og þannig fá möguleika á því að verða formaður þegar sá tími rennur upp. Hermt er að Áslaug Arna Sigurbjörnsdóttir, ráðherra án fastrar búsetu, hafi fullan hug á embættinu og formennsku í flokknum. Samherjar Áslaugar segja hana hafi einbeittan vilja til þess að leiða flokkinn auk þess að vera orðin leið á flandrinu. Gárungarnir segja hana líta í spegil á hverjum morgni og spyrja sig eftirfarandi spurningar líkt og í ævintýrinu um Mjallhvíti: Hvernig get ég orðið formaður Sjálfstæðisflokksins? Áslaug Arna hefur sannað það á undanförnum árum að hún er til alls líkleg. Þess er skemmst að minnast að hún var örfáum atkvæðum frá því að sigra sjálfan Guðlaug Þór Þórðarson í prófkjöri.
Skæðasti keppinautur Áslaugar Örnu á framabrautinni er varaformaðurinn Þórdís Kolbrún Reykfjörð Gylfadóttir. Hermt er að hún sé áhugalaus um að taka við fjármálaráðuneytinu sem kann að verða henni dýrkeypt í kapphlaupinu til frekari metorða í flokknum. Á allra næstu dögum skýrist það hvernig Bjarni fléttar þessi mál áfram …