Elí Kristberg Hilmarsson birti færslu á Facebookarsíðu sinni í gærkveldi og óskaði eftir vitnum vegna árásar sem gerð hafði verið á átta ára son hans við rólóvöll rétt utan við Gráhellu á Selfossi um klukkan átta í sama kvöld. Hann lýsir meintum gerendum svohljóðandi: „Tveir hávaxnir unglingar, einn í rauðri peysu, einn í svartri og tveir klæddir gráum peysum og pólskumælandi.“
Í samtali við blaðamann Vísis segir Elí að sonur hans hafi komið heim í miklu uppnámi og segir árásamennina fjóra vera á aldrinum 15-16 ára.
„Hann var bara að labba heim frá vini sínum og gengur fram hjá róló sem er hérna nálægt okkur. Þá sér hann fjóra unglinga á vappinu í kringum rólóinn, það er náttúrulega orðið dimmt á þessum tíma. Þetta er rétt fyrir átta og hann er á leiðinni heim. Þá bendir einn þeirra á hann og þeir segja eitthvað á pólsku sem hann náttúrulega skilur ekki.“
Hann lýsir því hvernig þeir koma askvaðandi að syni sínum sem frýs: „Einn rífur í hettuna á honum, annar tekur í hann og hrindir honum og svo byrja þeir að sparka ítrekað í hann: bakið á honum, löppina, síðuna og annað. Hann er alveg með áverka eftir þetta. Eins og hann sagði sjálfur: „Ég var bara að labba og bjóst ekkert við því að þeir myndu koma og ráðast á mig,“ enda bara að labba heim til sín.“
Lögreglan á Suðurlandi staðfesti við fréttastofu Vísis að málið væri komið á borð þeirra og er í rannsókn.
Með færslunni birti Elí ljósmyndir sem sýna áverka á syni sínum og rifna úlpu.
