„Ég er venjulega klukkustund upp og niður fjallið,“ segir Sigmundur Stefánsson, fyrrverandi starfsmaður Skattsins, sem undanfarin átján ár hefur gengið hvorki meira né minna en 3263 ferðir á Úlfarsfell. Enginn vafi leikur á því að Sigmundur, sem er 76 ára, á Íslandsmet sem seint verður slegið. Hann sagði í samtali við Mannlíf að göngurnar skiptu hann öllu máli. Þetta ævintýri hans hófst árið 2005. Hann fór rólega af stað.
„Fyrsta árið fór ég 40 sinnum á fjallið. Um áramótin 2005 og 2006 setti ég mér það ártamótaheit að fara 100 ferðir. Ég stóð við það,“ segir Sigmundur sem síðar náði að fara upp í 294 ferðir á einu ári.
„Ég fékk hjartaáfall“
Sigmundur segist ganga á jöfnum hraða og ekki of hratt. Hann hefur lært af biturri reynslu að kapp er best með forsjá.
„Ég fékk hjartaáfall á Esjunni fyrir nokkrum árum. Ég datt niður og það þurfti að bera mig niður fjallið. Ég var með meðvitund allan tímann. Ég var fluttur á spítala og settur í hjartaþræðingu. Þá kom í ljós að ég var með stíflu í kransæðum,“ segir Sigmundur.
Framan af göngunum á Úlfarsfell bjó Sigmundur í Grafarvogi og þurftu að aka að fjallinu til að fara í göngurnar. Hann og eiginkona hans ákváðu seinna að minnka við sig húsnæðið. Þá var svo við að þeim bauðst íbúð á Úlfarsárdal, í skjóli fjallsins sem var honum svo kært. Þau slógu til. Sigmundur fór til fjallsins og er nú í göngufæri.
„Fjallið blasir við mér út um gluggann. Nú sleppi ég bílnum og geng á fjallið og nýt lífsins,“ segir Sigmundur.
Hann segist ekki vilja missa úr göngur því þá versnar líðan hans.
„Mér líður betur með að fara í reglubundnar göngur á fjallið. Ef það falla úr dagar þá finnst mér eitthvað vanta,“ segir Sigmundur.