Björn Birgisson upplifir ró og æðruleysi í Grindavík, frammi fyrir aðsteðjandi hættu vegna eldgoss.
Samfélagsrýnirinn orðhagi, Björn Birgisson skrifaði Facebook-færslu í gær um það æðruleysi sem hann upplifir í heimabæ sínum Grindavík, frammi fyrir ógninni sem er af tilvonandi eldgosi. „Hvar sem ég kem hér í Grindavík upplifi ég meiri ró og æðruleysi en í raun má búast við með hliðsjón af stöðu mála,“ skrifar hann í færslunni og segir svo að mögulegt eldgos gæti auðveldlega leikið bæjarfélagið mjög grátt. „Versta sviðsmyndin er sú að á augabragði breytist okkar sprellifandi bæjarfélag í kaldan draugabæ, það sem glóandi hraun verður það eina heita í bænum, brennandi og brjótandi niður.“
Í niðurlagi færslunnar segist Björn dáðst að æðruleysi bæjarbúa Grindavíkur. „Hér lifa allir í þeirri von að verstu spárnar gengi alls ekki eftir, en gera sér á sama tíma fulla grein fyrir að sú geti orðið raunin.“ Lokaorð Björns eru sterk: „Þetta eru í raun óþolandi aðstæður, en nú sést úr hverju fólk hér er gert. Alltaf sterkast þegar mest á reynir.“