Í nýrri umfjöllun Kveiks er ljósi varpað á rekstur fasteignafélagsins Upphafs sem var í eigu Novus, fasteignasjóðs GAMMA. Eftir kaup Kviku banka á GAMMA í fyrra kom í ljós að staða sjóðsins var umtalsvert verri en gert hafði verið ráð fyrir.
Í umfjöllun Kveiks segir að Kvika hafi „bitið á agnið“ þegar þáverandi eigendur GAMMA hafi farið að leita að einhverjum til að kaupa GAMMA. Síðar kom í ljós að eignir fasteignafélagsins voru ofmetnar og var virði þess lækkað úr 5,2 milljörðum í 40 milljónir.
Í umfjöllun Kveiks er þeirri spurningu varpað fram hvort að aðeins einn maður beri ábygð á tapi Upphafs, það er Pétur Hannesson sem starfaði sem framkvæmdastjóri Upphafs frá árinu 2014 til ársbyrjunar 2019.
Fékk 58 milljónir greiddar í 21 greiðslu fyrir „ráðgjöf“
Pétur mun hafa stofnað til umfangsmikils viðskiptasambands á milli Upphafs og verktakafyrirtæksins VHE, Vélsmiðju Hjalta Einarssonar, vegna bygginga á fjölda íbúða á höfuðborgarvæðinu. Upphaf mun þá hafa greitt VHE og undirverktökum þess ríflega sjö milljarða króna frá árinu 2015.
Í umfjöllun Kveiks er þá fjallað um gögn sem sýna fram á greiðslur VHE ýmist til Péturs eða félags í hans eigu, S3 Ráðgjöf. Um 21 greiðslu er að ræða, alls 58 milljónir, frá 2015 fram á mitt ár 2019.
Samkvæmt heimildum Kveiks vöktu greiðslurnar furðu hjá yfirmönnum Péturs hjá GAMMA en Pétur var í fullu starfi hjá GAMMA á sama tíma og hann fékk greitt frá VHE. Er fram kemur í umfjöllun Kveiks mun Pétur hafa neitað að gera grein fyrir þessum tekjum og skömmu síðar var hann rekinn.
Hvorki Pétur né forsvarsmenn VHE vildu í fyrstu lítið tjá sig um málið þegar fréttamaður Kveiks leitaði svara en seinna barst Kveik bréf frá lögmanni VHE þar sem VHE gekkst við að hafa greitt Pétri 58 milljónir. Sú skýring var gefin að VHE hefði greitt Pétri fyrir ráðgjöf.
Núverandi stjórnendur GAMMA með málið til lögreglu
Í umfjöllun Kveiks kemur fram að núverandi stjórnendur GAMMA hafa tilkynnt málið til lögreglu í ljósi þeirra gagna og upplýsinga sem Kveikur fjallar um.
„Samkvæmt upplýsingum Kveiks er málið því komið til meðferðar hjá Héraðssaksóknaraembættinu þar sem það verður rannsakað vegna gruns um auðgunarbrot. Sú rannsókn mun eftir því sem næst verður komist bæði snúast um meint brot Péturs Hannessonar og eins möguleg brot forsvarsmanna VHE,“ segir í umfjöllun Kveiks. Hana má skoða í heild sinni hérna.