Leynigestur í göngu Skrefa Ferðafélags Íslands á Úlfarsfell sló svo sannarlega í gegn. Haldið var í gönguna frá Úlfarsfelli í svartamyrkri á miðvikudaginn klukkan 18. Skömmu fyrir áætlaðan brottfarartíma kom leynigesturinn, Hera Björk Þórhallsdóttir, skyndilega úr sortanum. Hún er að sjálfsögðu ein fremsta söngkona landsins og meðal annars þekkt fyrir þátttöku sína í Eurovison-keppninni. Göngugarpurinn Guðrún Skúladóttir hreppti verðlaun fyrir að vera önnur tveggja sem giskuðu rétt á leynigestinn. Hera Björk, sem er ein Frostrósanna vinsælu, færði vinningshafanum nýútkomna plötu sína með jólalögum. Sjálf fékk hún bók og forláta húfu frá Ferðafélagi Íslands.
Á efsta tindi Úlfarsfells tók söngkonan lagið ásamt kór Skrefanna. Söngurinn var ákall um meiri snjó. Hópurinn tók æfingakerfið Haukinn áður en haldið var niður af fjallinu. Besta veður var á Úlfarsfelli og fólk ánægt með gönguna.