Björn Birgisson bendir á mismunandi viðbrögð þjónustuaðila við hamförunum í Grindavík. Segir hann réttast að stjórnendur bankanna fái sér hauspoka.
Samfélagsrýnirinn frá Grindavík, Björn Birgisson, skrifaði færslu á Facebook þar sem hann ber saman mismunandi viðbrögð bankanna annars vegar og Orku náttúrunnar hins vegar, í kjölfar þeirra hamfara sem vofa yfir Grindvíkinga um þessar mundir. „Bankarnir stuðla að efnahagslegum aftökum með háu vaxtastigi og verðbótum vegna verðbólgu. Nú bjóða þeir Grindvíkingum að fresta þeim aftökum um óákveðinn tíma, kannski þrjá mánuði.“ Orka náttúrunnar býður á sama tíma, að sögn Björns, Grindvíkingum fría hleðslu á rafmagnsbíla á meðan óvissuástandið varir. „Gerir þannig sitt til að létta undir með fólkinu sem nú stendur hugsanlega frammi fyrir mestu efnahagslegum röskunum lífs síns,“ skrifaði Björn og bætti við að lokum: „Ég mæli með því að stjórnendur bankanna fái sér hauspoka.“