Íslenskum skemmtistað hefur verið lokað tímabundið vegna útbreiðslu kórónaveirunnar. Framkvæmdastjóri staðarins segir ákvörðunina hafa verið tekna að vel ígrunduðu máli.
Skemmtistaðnum KIKI á Laugavegi 22 hefur verið lokað tímabundið vegna útbreiðslu COVID-19 hér á landi.
Framkvæmdastjóri staðarins, Árni Grétar Jóhannsson, segir ákvörðunina tekna með öryggi viðskiptavina í huga. Hann segir frá þessu í samtali við GayIceland.
Árni segir ákvörðunina hafa verið tekna að vel ígrunduðu máli. Hann segir flókið að halda staðnum opnum samhliða því að fylgja leiðbeiningum yfirvalda í tengslum við samkomubann og því hafi verið ákveðið að loka staðnum tímabundið og tryggja þannig öryggi viðskiptavina KIKI.
Hann tekur fram að fólk geti gjarnan verið kærulaust þegar vín er haft um hönd og þess vegna telur hann öruggast að loka staðnum tímabundið.
Hann segir að staðurinn verði opnaður aftur um leið og hægt er og lofar góðu partíi þegar tækifæri gefst.