Ráðist á kennara af gengi í sendibíl: „Kýldur í andlitið“

Gísli Baldvinsson hafði heldur betur áhyggjur af kennurum árið 1982.

Í DV árið 1982 er fjallað um grein sem kennarinn Gísli Baldvinsson skrifaði í félagsblað Kennarasambands Íslands. Þar setti Gísli fram þá kröfu að hið opinbera tryggi kennara sem verða fyrir slysum eða ofbeld í starfi. Hann segir frá þremur dæmum frá 1981 og 1982.

„Ráðizt var á kennara, hann kýldur í andlitið af gengi sem ku aka á milli staða í sendibíl og berja náungann. Annað dæmi er um kennara sem var frá vinnu í vikutíma vegna eymsla í baki og hálsi eftir árás. Sá sem hana gerði sleppti ekki taki sínu fyrr en hann var snúinn niður,” segir Gísli. Í þriðja dæminu segir Gísli frá því að tveir nemendur strengdu band yfir gang sem kennari gekk á og datt í gólfið. Við fallið hryggbrotnaði kennarinn en nemendur sögðu um óviljaverk hafi verið að ræða

„Eftir þessa upptalningu er ljóst að kennarar verða að gera þá kröfu til hins opinbera að það tryggi þá í starfi. Margar stéttir hafa slíka tryggingu, svo sem byggingarmenn. Þetta er kjaraatriði og því hefur slik krafa verið sett í kröfugerð BSRB. Sú krafa er ekki sett af brunavörðum né lögreglu heldur kennurum, því miður,” sagði Gísli að lokum.