Arnþrúður Karlsdóttir, útvarpsstjóri á Útvarpi Sögu, var með stórfínt viðtal við Ólaf Pál Gunnarsson, stjórnanda Popplands á Rás 2 í vikunni sem leið.
Ólafur Páll var einlægur þegar hann lýsti því að hann hefði glímt við það að stama frá barnæsku og ekki séð fyrir sér að hann gæti orðið útvarpsmaður. Stundum var stamið honum svo erfitt að hann kom ekki upp orði.
Hann fékk vinnu á Rás 2 sem tæknimaður sem leiddi til þess að hann fór að spreyta sig á smærri verkefnum sem útvarpsmaður. Hann sigraðist á vandanum og varð einn af þekktustu útvarpsmönnum Íslands með tónlistarþætti sína og einstök viðtöl. Nú eru liðin yfir 30 ár síðan hann hóf störf á Rásinni.
Þegar leið á viðtalið vildi ekki betur til en svo að Arnþrúði svelgdist á og hún fékk ákaft hóstakast og varð málvana. Ólafur Páll var snöggur að bregðast við, enda vanur maður og tilkynnti um auglýsingar. Arnþrúður kom svo inn í útsendinguna eftir nokkrar mínútur, afturbata, og viðtalið hélt áfram …