Samtals hafa 109 greinst með COVID-19 hér á landi og um 900 eru í sóttkví vegna veirunnar. Þetta kom fram á upplýsingafundi þar sem Víðir Reynisson, yfirlögregluþjónn, Þórólfur Guðnason, sóttvarnarlæknir, og Alma D. Möller, landlæknir fóru yfir stöðu mála.
Þórólfur greindi frá því að búið sé að rannsaka um 1000 sýni.
Flestir þeir sem hafa greinst með COVID-19 hafa verið í skíðaferðum í Evrópu að sögn Þórólfs en hann sagði að einhver smitanna sé hægt að rekja vil Bandaríkjanna. Innanlandssmit eru 24.
Tveir eru á spítala vegna COVID-19.
Þórólfur sagði rakningateymi eiga mikla vinnu fyrir höndum En verið er að rekja ferðir þeirra sem hafa veikst nýlega. „Það er gríðarlega mikil vinna að hafa uppi á öllum.“
Þórólfur hélt áfram að hvetja fólk til að þvo hendurnar reglulega og gæta hreinlætis. Hann sagði samfélagslegar aðgerðir, þar sem fólk og fyrirtæki passa upp á hreinlæti, skila miklu.