Lögreglan veitti steypubíl eftirför í miðbæ Reykjavíkur í morgun. Mikil hætta skapaðist þegar bílnum var ekið á móti umferð á Sæbraut, en allt að sjö lögreglubílar tóku þátt í eftirförinni.
Steypubíllinn stóð við Vitastíg þar sem framkvæmdir standa yfir. Pétur Ingason, framkvæmdastjóri Steinsteypunnar, eiganda bílsíns segir í samtali við Vísi að einhver óprúttinn aðili hafi stigið upp í bíllinn og ekið honum af stað.
Myndbönd af eftirförinni benda til að eftirförinni hafi lokið við Kleppsveg, þar sem ökumaður ekur upp á grasbala og hleypur úr bílnum. Þar tókst lögreglumönnum að hlaupa manninn uppi.
Í tilkynningu frá lögreglu segir að steypubílnum hafi verið stolið við nýbyggingu á Vitastíg í miðborg Reykjavíkur og honum ekið niður Laugaveg, Bankastræti, um Lækjargötu og eftir Sæbraut uns bifreiðin stöðvaðist nálægt Kleppsvegi þar sem eftirförinni lauk. Lögreglan var með mikinn viðbúnað vegna málsins, en ökumaðurinn, karlmaður um þrítugt, virti öll stöðvunarmerki að vettugi og setti bæði sjálfan sig og aðra vegfarendur í mikla hættu með þessu framferði, en hann ók m.a. á öfugum vegarhelmingi á meðan þessu stóð. Ökumaðurinn var handtekinn á vettvangi og fluttur á lögreglustöð.
Ja sjæææll. Þetter bara eins og i Ameríku
Posted by Sigmar Arnarson on Miðvikudagur, 11. mars 2020
Er í sjokki, varð vitni að þessu bara rétt áðan á gatnamótum á Sæbrautinni. Vegfarendur á göngustígnum þurftu að hlaupa undan, bílstjórinn steytti hnefann og löggan að elta. Pottþétt stolinn bíll. Hrikalegt og eins og í bíómynd. https://t.co/OA5xfg967c
— Ólöf Hugrún (@olofhugrun) March 11, 2020