Katrín Jakobsdóttir, forsætisráðherra, Bjarni Benediktsson, fjármála- og efnahagsráðherra og Sigurður Ingi Jóhannsson samgöngu– og sveitarstjórnarráðherra, kynntu rétt í þessu áætlanir ríkisstjórnarinnar til að bregðast við þeim áhrifum sem COVID-19 mun hafa á efnahagsmálin.
Katrín byrjaði á að minna á að ríkisstjórnin sjái nú fram á að þurfa að endurskoða allar sínar áætlanir vegna útbreiðslu veirunnar.
Bjarni tók undir og sagði að forsendur fjármálastefnu og áætlana sem hafa verið gerðar séu nú brostnar. Þess vegna þurfti að koma með nýja áætlun. Hann segir að ný áætlun verði kynnt á næstu mánuðum, líklegast um miðjan maí.
Bjarni segir nauðsynlegt að bregðast við fyrirséðri niðursveiflu og aðstoða þau fyrirtæki sem munu lenda tímabundið í vanda, m.a. með því að opna á það að fyrirtæki fái frest til að standa skil á sköttum og gjöldum.
„Ferðaþjónustan mun finna fyrir áhrifum vegna atburðanna.“
Bjarni hefur áhyggjur af ferðaþjónustunni vegna útbreiðslu COVID-19. „Ferðaþjónustan mun finna fyrir áhrifum vegna atburðanna.“ Bjarni sér fyrir sér að setja stórt markaðs- og auglýsingaátak af stað þegar ástandið batnar með það að markmiði að auglýsa Ísland sem áfangastað og kalla ferðamenn til landsins.
Sigurður Ingi þakkaði heilbrigðisstarfsfólki fyrir vel unnin störf og sömuleiðis almenningi fyrir sýndan skilning.
„Óvissan er mikil,“ sagði Katrín í lok fundarins. Hún tók fram að Íslendingar búi yfir mikilli reynslu til að takast á við ófyrirsjáanlegar aðstæður og að sú reynsla komi sér vel núna.