EastEnders og Love Actually leikkonan Martine McCutcheon hefur gjörbreytt líkama sínum á undanförnum árum en deildi hún leyndarmálinu með lesendum Hello á dögunum.
Martine glímir við ýmsa sjúkdóma, þar á meðal Lyme-sjúkdóminn, ME og vefjagigt en segir hún veikindin hafa sett strik í reikninginn þegar hún reyndi að léttast. Hún segist hafa reynt að léttast á megrunarkúrum en það hafi einfaldlega aldrei virkað. Því hafi hún búið til sínar eigin reglur og segist hún nú vera í besta formi lífs síns. „Mér finnst bara mjög mikilvægt að hvetja konur til að vera bara besta útgáfan af sjálfum sér,“ sagði stjarnan sem borðar mikið af grænmeti og ávöxtum.
„80 prósent máltíða vikunnar borða ég aðallega hollt prótein, grænmeti og ávexti, lífrænan og grænmetissafa, og egg. Og svo fæ ég mér góðgæti 20 prósent af tímanum,‘‘ segir hún en þyngdaraukninguna má rekja til hormónameðferða. „Það tók mig langan tíma að verða móðir og ég upplifði margar hindranir. Líkami minn gekk í gegnum miklar breytingar í kjölfarið. Líkami kvenna er flókinn og viðkvæmur.“ Svo virðist sem breyttur lífsstíll stjörnunnar hafi góð áhrif á hana og segist hún bæði vera hraust og sátt í eigin skinni.