Í hlaðvarpsþáttunum Mamma rifjar Kolbeinn Þorsteinsson upp minningar sínar um Ástu Sigurðardóttur, móður sína, og segir frá þeim tíma sem hann átti með henni og baráttu hennar til að halda börnum sínum í skugga veikinda og allsleysis. 35 ára varð hún einstæð móðir með fimm börn á framfæri sínu og litlar sem engar tekjur eða staðfestu í lífinu. Börnin missti hún nánast eitt af öðru og þau aðskilin.
Ásta naut liðsinnis systur sinnar og móður í baráttu við kerfið. Umgengnisréttur Ástu var háður ýmsum skilyrðum, sem urðu henni þó oft ofviða. Faðir barnanna var lítt sjáanlegur í þeim slag sem Ásta og börnin stóðu í á þessum tíma.
„Ljóst má telja að mamma hafi vonað að pabbi gæfist ekki upp og að hann sneri ekki baki við fjölskyldunni. Pabbi átti afmæli 15. mars og í afmælisgjöf frá mömmu, árið 1965, fékk hann forláta Omega-armbandsúr með áletrun á bakinu. Hver veit nema þar hafi verið um ræða leið mömmu til að reyna að halda í hann, en sú leið var dæmd til að mistakast og pabbi lét sig hverfa endanlega,“ segir Kolbeinn meðal annars um samband foreldra sinna í þættinum.
Hægt er að hlusta á þáttinn Mamma á hlaðvarpsveitu Mannlífs.