Frá og með deginum í dag verður dreifingu á bréfpokum undir lífrænt sorp hætt í verslunum. Fólk getur nálgast bréfpokana endurgjaldslaust í verslun Góða hirðisins og endurvinnslustöðvum Sorpu. Margir hafa gagnrýnt ákvörðunina á samfélagsmiðlum og velt því fyrir sér hvers vegna fólk þurfi að gera sér auka ferð til þess að nálgast pokana. Mun það vera vegna sparnaðar.
Gunnar Dofri Ólafsson, samskipta- og þróunarstjóri Sorpu, greindi frá því í samtali við Vísi að kostnaðurinn við dreifinguna á bréfpokunum hafi ekki verið forsvaranlegur. Ákvörðunin hafi verið tekin í samráði við sveitarfélögin. „Það er rétt að halda því til haga að við sjáum að við höfum þegar sett út 24 milljónir poka, sem ættu að endast öllu höfuðborgarsvæðinu í rúmlega eitt og hálft ár, en það er ekki liðið ár síðan kerfið var innleitt,“ sagði Gunnar og bætti við að fjölda poka væri að finna í skápum og skúffum heimilana í landinu.