Vegna mikils kulda næstu daga eru notendur hjá Selfossveitum beðnir um að spara heita vatnið.
Kuldatíðin sem nú ríkir víða á landinu hefur meira í för með sér en kuldahroll og hrímaðar bílrúður. Samkvæmt frétt Sunnlenska.is er það kalt í veðri að notendur Selfossveita eru beðnir um að fara sparlega með heita vatnið.
„Nú er kalt í veðri með töluverðum blæstri og útlit fyrir að svo verði áfram. Við viljum því hvetja alla til að fara vel með heita vatnið og fara eins sparlega með það og hægt er. Ljóst er að á meðan þessi kuldatíð varir verður skert þjónusta í til dæmis sundlaugar og íþróttamannvirki þar sem varmi til húshitunar er í fyrsta forgangi,“ segir Sigurður Þór Haraldsson, veitustjóri í samtali við Sunnlenska.is.
Gefur Sigurður þau ráð til fólks, svo það geti sparað heita vatnið og þannig kyndikostnað, að passa upp á að loka gluggum og láta ekki útidyr standa opnar lengur en þarf.
„Þá skiptir einnig máli stillingar ofna, að óþarflega heitt vatn renni ekki frá þeim og að ofnarnir séu ekki byrgðir, til dæmis með síðum gluggatjöldum eða húsgögnum. Þá eru heitir pottar við heimili talsvert þurftafrekir á vatn og gott að hafa í huga að fara sparlega með neysluvatn eins og við uppvask, sturtur og böð.“