Alls hafa 65 sýni verið rannsökuð af sýkla- og veirufræðideild Landspítalans vegna Covid-19. Öll reyndust neikvæð. 40 þjóðir hafa greint tilfelli og þeim fjölgar sem hafa náð sér af veikindunum. Næsti stöðufundur í samhæfingastöð almannavarna verður haldinn mánudaginn 2. mars nk., að óbreyttu.
Frá þessu er greint í fréttatilkynningu á vefsíðu Landlæknisembættisins.
Þar segir einnig að vegna mikils álags á Heilsugæslunni og Læknavaktinni, sem sinnir þjónustu í síma 1700 við einstaklinga sem úr eru tekin sýni, hefur verið ákveðið að auka stuðning og aðbúnað.
Þá má nú nálgast upplýsingar fyrir börn og ungmenni á vefsíðunni.
„Á upplýsingafundi samhæfingarstöðvar í gær voru kynntar niðurstöður starfshóps ríkislögreglustjóra sem vann að greiningu á hugsanlegum aðgerðum sem miða að því að stemma stigu við komu ferðamanna frá áhættusvæðum. Koma þar til skoðunar m.a. ákvæði laga um sóttvarnir, um loftferðir og ákvæði laga um útlendinga. Sóttvarnaviðbrögð verða að vera í samræmi við áhættumat og þar að vega áhrif viðbragða á móti áhrifum farsóttarinnar. Ef landinu er lokað komast Íslendingar sem staddir eru erlendis ekki heim, nema skipulagður sérstakur heimflutningur. Einnig munu aðföng og útflutningur raskast.“
Í tilkynningunni eru ferðamenn á skilgreindum áhættusvæðum og þeir sem hafa nýlega komið þaðan beðnir um að huga vel að persónulegu hreinlæti og sýkingavörnum.
Áhættusvæði eru óbreytt:
Skilgreind áhættusvæði með mikla og litla smitáhættu
Svæði með mikla smitáhættu eru Kína, fjögur héruð á Norður Ítalíu (Lombardía, Venetó, Emilia Rómanja og Píemonte), Suður-Kórea og Íran. Sóttvarnalæknir ráðleggur einstaklingum frá því að fara til þessara landa/svæða að nauðsynjalausu, en þeir sem koma hingað frá þessum stöðum er ráðlagt að fara í 14 daga sóttkví Opnast í nýjum glugga. Athugið að þeir sem fara um þessi svæði en dvelja ekki á þeim þurfa ekki að fara í sóttkví. Þannig þurfa þeir sem fljúga til eða frá þessum svæðum, eftir dvöl á skíðasvæðum utan þeirra, ekki að fara í sóttkví.
Svæði með litla smitáhættu
Áhættusvæði sem skilgreind hafa verið með litla smitáhættu eru önnur svæði á Ítalíu, Japan, Singapúr, Hong Kong og Tenerife (fyrir utan H10 Costa Adeje Palace hótelið). Ferðamenn sem eru nú þegar á þessum svæðum og þeir sem hafa nýlega komið þaðan eru beðnir um að huga vel að persónulegu hreinlæti og sýkingavörnum en ekki er talin nauðsyn á sérstakri sóttkví fyrir þá sem eru nýkomnir frá þessum svæðum. Einstaklingum sem koma frá svæðum með litla áhættu eru beðnir að láta vita í síma 1700 ef þeir veikjast innan 14 daga eftir brottför frá þessum svæðum.