Móður vantaði aðstoð en fékk enga árið 1991.
„Þarf ég virkilega að vera óheiðarleg, vera alkóhólisti eða eiga mann sem lemur mig til að fá aðstoð Félagsmálastofnunar? Mér virðist það vera svo að ef maður er heiðarlegur, vinnur sína vinnu og stendur í skilum eigi maður enga möguleika á aðstoð,“ sagði íslensk einstæð þriggja barna móðir í samtali við DV árið 1991. Hún hafði flutt til landsins 16 mánuðum fyrr en hún hafði búið í eitt ár í Svíþjóð þar á undan. Hún leitaði eftir húsnæðisaðstoð hjá Félagsmálastofnun en fékk enga aðstoð og furðaði sig á því.
„Stelpumar mínar þrjár vildu ekki búa úti svo við fluttum heim. En ég hef bara verkamannalaun og hef ekki efni á að leigja á almennum markaði þannig að ég óskaði eftir húsnæðisaðstoð hjá Félagsmálastofnun. Til að byrja með samþykkti Félagsmálastofnun að taka þátt í leigu með mér og ég fékk íbúð á almennum markaði sem kostaði 43 þúsund krónur á mánuði. Við mæðgurnar vorum búnar að flytja og gera leigusamning en þá vildu þeir hjá Félagsmálastofnun ekki hjálpa mér og sögðu aö ég væri með nokkur þúsund krónum of mikið í tekjur. Ég var með rétt rúmlega 55 þúsund krónur í laun,“ sagði konan um málið. Samkvæmt konunni var henni sagt að allar íbúðir væru í útleigu en að hún væri á forgangslista.
„Ég hef hins vegar fylgst með íbúðum sem hafa losnað og bent þeim hjá Félagsmálastofnun á þær en ekkert gerist. Ég veit dæmi þess að kona sem bað um húsnæðisaðstoð hjá stofnuninni, því maðurinn hennar berði hana og að þau væru skilin, fékk íbúð. En málið er að þótt þetta fólk sé skilið á pappírunum er það ekki raunin. Maðurinn flutti með konunni inn í þessa íbúð og þau búa þar saman. Ég gæti alveg náð mér í mann og sagt að hann berði mig og þá kannski fengi ég íbúð. Eða ef ég drykki og færi í meðferð þá fengi ég íbúð. Það er eins og það sé verið að reyna að ýta manni út í líferni sem maður ekki vill. Ef maður reynir að standa sig í lífinu lokast allar dyr,“ en konan gekk á milli vina og ættingja til að eiga þak yfir höfuð sitt og dætra hennar. Á 16 mánuðum bjuggu þær á 12 mismunandi stöðum.
„Mér finnst þetta furðulegt kerfi sem vill ekki hjálpa þeim sem vilja hjálpa sér sjálfir en hjálpar þess í stað fólki sem jafnvel segir ósatt og notfærir sér þetta,“ sagði hún að lokum.