Gríðarleg fagnaðarlæti urðu á meðal innmúraðra Sjálfstæðismanna eftir að kom á daginn að útsendarar flokksins höfðu náð inn í varastjórn í Félagi eldri borgara í Reykjavík. Með gríðarlegri smölun tókst að ná kosningu sanntrúaðra í varastjórnina. Fagnaðarlætin innan flokksins eru ekki síst vegna þess að flokksmenn hafa undanfarin ár glímt við fylgistap. Sigurinn í gær var því kærkominn og silkihúfur flokksins sitja nú í varastjórn. Meðal þeirra Sjálfstæðismanna sem voru kosnir er Jón Magnússon, lögmaður sem barist hefur til metorða árum inan flokks árum saman. Hann var kjörinn þingmaður Frjálslynda flokksins og gekk aftur í Sjálfstæðisflokkinn og hafði með sér þingsætið. Bessý Jóhannsdóttir náði líka kjöri. Hún hefur árum saman reynt að komast til áhrifa í flokknum en ekki náð lengra en svo að sitja sem varaþingmaður á Alþingi og um tíma í borgarstjórn. Ragnar Árnason hagfræðingur var einn helsti hugmyndafræðingur Sjálfstæðisflokksins án þess að ná áhrifum. Hann er nú í varastjórninni. Það gefur svo flokknum meira vægi að hann telur sig eiga formanninn, Sigurð Ágúst Sigurðsson fyrrverandi framkvæmdastjóra, sem kosinn var með yfirburðum.
Óljóst er hvað Sjálfstæðisflokkurinn ætlar sér með varaskeifurnar og Félag eldri borgara. Hugsanlegt er að sigurinn þjóni aðeins þeim tilgangi að byggja upp sjálfstraust í flokknum sem marar í hálfu kafi með innan við 20 prósenta fylgi. Gárungar spá því að næsta skipulagða átak flokksins verði að ná undirtökum í sóknarnefndum í kringum landið. Slagorð kosninganna gæti verið: Út yfir gröf og dauða …